Act 4 | NAF | STEP | Pitamak Zânaŋ ke tati animbi zet kegok diindomambe tapmalu sâpe sâpe bumbu an ekŋen ma Zudayelen sesewat mka temaŋgalen an tipdakutum ekŋengat ŋeŋaŋin ma zii zet zikat indanda an ekŋenaŋ kopmâbien. Ekŋenaŋ kotati ekme Pitamak Zânaŋ Zisasiyaŋ wage ma am gakikiŋaŋaŋ wabep keyet zapatnaŋ animbi sambe tadiindom kwapmalu ekŋenaŋ keyet nâme ŋep ku beme indatimti zemidosât nâmbienaŋgut msat gasi beyeyepmti belak idatimti met mka katikŋan sekek idewien.

Acts 4

Pitamak Zânmak mka katikŋan idewien

1 Pitamak Zânaŋ ke tati animbi zet kegok diindomambe tapmalu sâpe sâpe bumbu an ekŋen ma Zudayelen sesewat mka temaŋgalen an tipdakutum ekŋengat ŋeŋaŋin ma zii zet zikat indanda an ekŋenaŋ kopmâbien. Ekŋenaŋ kotati ekme Pitamak Zânaŋ Zisasiyaŋ wage ma am gakikiŋaŋaŋ wabep keyet zapatnaŋ animbi sambe tadiindom kwapmalu ekŋenaŋ keyet nâme ŋep ku beme indatimti zemidosât nâmbienaŋgut msat gasi beyeyepmti belak idatimti met mka katikŋan sekek idewien. 4 Yaŋgut am egetgalen zet nâmti notnaŋaŋ nâmkiŋpepe aikti Zisasmagen tusume am nâmkiŋpepemak sambe penaŋ temakwep 5000 mee kogok beye.

Pitayaŋ an damuŋ ekŋengat monzalaminan Zisasiyet yaŋaŋ zemkawaŋ beye

5 Msa msame sâpe sâpe bumbu an ŋeŋaŋ ma sesewat mka temaŋgalen an damuŋ notnaŋ ma zii zet zikat indanda an ekŋenaŋ meti sâpe sâpe bumbu an ŋeŋaŋin temaŋ Anas ma egalen maŋgaengatnaŋ am notnaŋ ma Kaipas ma Zân ma Aleksandia ma sâpe sâpe bumbu an notnaŋ ekŋenmak temakwep Zelusalem mka teman ondekti Pitamak Zân tuŋguwinan onzemidemti pigok idayaŋkwesiwien, “It winde kwiyaŋ ma kwiyet kwitnanen ma meluwaŋ zigok penaŋ mti an wesiŋ kapi mmalu dolakŋaŋ beyan?”

8 Idayaŋkwesime Pitayet keŋanen Emetak Teŋaŋ zet same zelin dopmaŋ pigok gilik zemindaye, “Sâpe sâpe bumbu an ŋeŋaŋŋne ma sesewat mka temaŋgalen an damuŋŋne in nit awesiŋ ke zigok penaŋ mti mmalu dolakŋaŋ bep keyet yaŋaŋ penaŋ nâsâgât ndayaŋkwesimti talip. 10 Keyepmti nit zemkawaŋ bemalu in ma Islael am ilinsakwep yaŋaŋ nâmâtâlit. Zisas Kilais Nasalet mkaengatnaŋ e in tewen kumasasok peme gakime bewien. Yaŋ Kawawaŋaŋ naman gakikiengatnan mme wageyaŋ main. Egat kwitnanen an wesiŋ kapi sekŋaŋ mmalu dolakŋaŋ beyanaŋ kapi tapme taegip. 11 An Zisas keyet Kawawaŋgalen Zet Itnaŋanen baen meluwaŋ kapigok mimiŋaŋ tazin,

‘Mka walalat an ekŋenaŋ tepum ŋen bekanaŋ zemti peme meweŋgeyaŋ alak tepum keyaŋ mka tepumaŋ kaliŋaŋ penaŋ bemti mka atam tazin.’
(Sam 118:22)

12 Kawawaŋaŋ msalen an ŋenaŋ am ŋen yomengatnan gilik zemti indatitiyet winde ŋen ku saye. Egaŋ Zisasiyaŋ mulup ke mimiyet nâmti ek etaŋ saye.”

13 Zet keboŋ keboŋ etaŋ tazemalu am tabienaŋ nâmti zewien, “An zut kapiyaŋ nânâ mka temanen ku mebun. Zisasmak belak mamtemunaŋgut nânâ kaboŋ kapi deeset tiwunaŋ kiŋgagapiŋ pi nâmtalati tazelup.” Zemti nâmtemtem penaŋ mbien. 14 Âpme ekŋenaŋ an setnaŋ bekanaŋ weyaŋpewun ke egetmak ilinsakwep tapme indikti zet dopmaŋ ŋen gilik zemindandayet nâme ŋep ku beme peme tage. 15 Kegok zemti tabienaŋ yek beme eget zemideme zupman towepmalu ilinak tati pigok zenâ zenâ mbien, 16 “An zut kapi zigok mimidasenup,” zem zenâwien? “Egelaŋ menok ke msokbemalu Zelusalem mkaen animbi sambeyaŋ keyet zapatnaŋ ilak nâme delaŋ zep keyepmti nin ŋep ku iyaŋ indendeyelen bein.” 17 Zem mbienaŋ yek beme zewien, “Yegat mulup ewe tusum mmalu am sambeyaŋ nâmbepgapmti nin zemkiŋgagat zet zemann egelaŋ keyet kiŋgati Zisasiyet kwitnaŋ ewe ku mpalakŋaŋ bewalup.”

18 Kegok zemnâmpemti naman idazemtetime mka keŋanenak mowepmalu pigok zewien, “It am ŋen ewe Zisasiyet yaŋaŋ ŋen ku zemzikat indawalup.” 19 Kegok zeme Pitamak Zân egelaŋ zewun, “Nit zet kapi zemalu ilin opem nâit. Ingalen zet gawepumti Kawawaŋgalen zet peŋ pemalu toweme keyet Kawawaŋaŋ nigat nâme zigok bewe? 20 Nit Zisasiyet mulupmaŋgat yaŋaŋ sambe be ekmâtâpmalu delaŋ zeye. Keyepmti kwizapatnaŋ kapi belak atam pemalu ku tabe.” 21 Egelaŋ kegok zemalu an ŋeŋaŋ ekŋenaŋ zemkiŋgagat zet notnaŋ ewe tusumdiidomti belak ideme toti mebun. Am sambe ekŋenaŋ muluwaŋ ke ekti Kawawaŋgat sesewatsawien keyepmti an temaŋ temaŋ ekŋen keyaŋ kwindemti an zut ke kwileki ŋen ku miidawien. 22 An wesiŋ Pitamak Zânmak menok temaŋ egat palen mti weyaŋpewun. An ke nup kanaŋ 40 sebempein.

Am nâmkiŋpepemagaŋ dundundu mulup katikŋaŋ mbien

23 Pitamak Zânaŋ amobotnaŋ ekŋenaŋ katikideme egelaŋ nâmkiŋpepemak am nolitne ekŋenmagen koti ondedagen sâpe sâpe bumbu an ma sesewat mka temaŋgalen an damuŋ notnaŋ ekŋenaŋ zet zewien keyet zapatnaŋ mimindawien. 24 Âpme ekŋenaŋ zet ke nâmti keŋin ondek kwep bemti Kawawaŋgat pigok dunduwien,

“Amobotnaŋ, geŋ kululuŋ msat ma nembu temaŋ ma kwitnaŋ kwitnaŋ sambe mamaŋaŋmak wemezin kapi mmane sokbem mâge.
(Kisim Bek 20:11; Sam 146:6)

25 Geŋ ningat yeŋsokŋ Dewit mulup andi Emetakdi Teŋaŋ keŋaŋ m eleŋ beleŋ beme zet kapigok zeye,

‘Zigogat am Zuda maŋgaen ku sokbembeŋaŋ ekŋenaŋ Amobotnaŋgat ŋenzinziŋ mti kusât tapmip? Ma pe kwilekiyet am ekŋen kapiyaŋ ondekti kwitnaŋ kwitnaŋ yaŋaŋ yaŋepiŋ kapi msâgât tazenâip? 26 Msalen an damuŋ sambe ekŋenaŋ Amobotnaŋ Kawawaŋ ma Nemuŋaŋ Kilais egetmak âsâgât keŋ kwep bemti zenâ zenâ tapmip.’
(Daniel 9:24)

27 Dewilaŋ zeye keyet kataŋ amobotnaŋ Elotmak amŋane Islael ekŋenmak am Zuda maŋgeen ku sokbembeŋaŋmak amobotnaŋin Pailet ekŋenaŋ mka temaŋ kapi temakwep bemti Kawawaŋ geŋ Zisas mulup andi teŋ ke pemane am yomengatnan ndatitiyet ombempemti zempemane koge ek kume gakikiyet mulupmaŋ penaŋ sukwep mbien. 28 Geŋ eweŋan baen mulup andi kemagen kwitnaŋ kwitnaŋ ke sokbembeyet zemkabewanan keyet kataŋ sokbemsaye. 29 Yaŋ alak pi naman nin Zisas mâti mamann amnaŋ ningat kasa tapminndaip keyet Amobotnaŋ geŋ kasa keyet keŋan winde ndamti ndamukulem mmane nin kiŋgagapiŋ gâlen zet zapadi dolakŋaŋ kapi ammagen windeŋambeŋ zemkawaŋ bemann zet zapadaŋ palakŋaŋ bewe. 30 Kawawaŋ, geŋ mulup andi teŋ, Zisas egat mti winde ndamane nin am zawatmak ekŋen mmann alik bewep ma nemundi Zisas egat kwitnanen nin menok yaŋaŋ igak igak mbanup.”

31 Kegok dundum delaŋ zeme mka ondek tapmambienen ke titok temaŋ mti mekwapme Kawawaŋgalen Emetak Teŋaŋ am tabien bee keŋinan topme ekŋenaŋ kiŋgagapiŋ eleŋ belaŋ bemti zet zapat dolakŋaŋ am keŋan windeŋambeŋ penaŋ zemkawaŋ bemebien.

Nâmkiŋpepemak ekŋenaŋ kwitnaŋ kwitnaŋin apalak timambien

32 Zisas nâmkiŋpepeŋaŋ am ekŋenaŋ ondekti keŋ kwep bemti milawalin mee toŋan toŋan ku timamkwabien ekŋenaŋ milawalin belak apapalak timamkwabien. 33 Kegok taindame ombemindendeŋaŋ ekŋenaŋ Zisas gakikiengatnan wage keyet zapatnaŋ windeŋaŋbeŋ am ekŋengat zemkawaŋ bewien. Âpme am nâmkiŋpepemak ekŋengat tuŋguwinan Kawawaŋgalen keŋ taolelaŋ bemisik tage. 34 Ekŋenmagen ŋenaŋ ola olat palen ku maŋge. Ekŋenaŋ msalin mee tage ke an ŋenaŋ kwitime mânep ke mti met ombemindendeŋaŋ an ekŋengat belinan mambemtemien. 35 Âpme ekŋenaŋ ke timtati am ŋenaŋ kwileki ŋengat olati kot zeme kataŋ milombiŋinanengatnan ke timtati maindatemien.

36 Âpme kan keyet an ŋen Zosep ombemindendeŋaŋ ekŋenaŋ kwitnaŋ Banabas manzemtemien. (Banabas kwit keyet yaŋaŋ, An Zemgwatnaŋ Mimi.) An ke Liwaiyelen maŋgeengatnaŋ msatnaŋ Saipalasiyetnaŋ. 37 An keyaŋ msatnaŋ an ŋeniyet zeme kwitime mânep ke mti kot ombemindendeŋaŋ ekŋengat belinan beye.